ससून रुग्णालयात शिपाई पदाच्या नोकरीचे आमिष; ३.५० लाखांची फसवणूक करणाऱ्या दाम्पत्यावर गुन्हा दाखल

बंडगार्डन पोलिसांत सोमवार पेठेतील पती-पत्नीविरुद्ध गुन्हा; रोख अन् ऑनलाइन उकळले पैसे!

पुणे: ससून सर्वोपचार रुग्णालयात कायमस्वरूपी नोकरीचे स्वप्न दाखवून एका ३३ वर्षीय महिलेची साडेतीन लाख रुपयांची फसवणूक केल्याची घटना उघडकीस आली आहे. ससून क्वार्टर्समध्ये राहणाऱ्या पती-पत्नीने संगनमत करून हे फसवणुकीचे जाळे विणले होते.

याप्रकरणी दस्तुर कॅम्प परिसरात राहणाऱ्या किरण सनी कांबळे (वय ३३) यांनी दिलेल्या तक्रारीवरून बंडगार्डन पोलीस ठाण्यात मंगळवार, १५ सप्टेंबर २०२६ रोजी गुन्हा दाखल करण्यात आला आहे. हा प्रकार २७ सप्टेंबर २०२५ ते आजतागायत घडला.

श्याम अशोक खैरे (रा. ससून क्वार्टर्स, सोमवार पेठ) आणि दिपाली श्याम खैरे (रा. ससून क्वार्टर्स, सोमवार पेठ) अशी आरोपी दाम्पत्याची नावे आहेत. याप्रकरणी किरण सनी कांबळे (वय ३३, रा. दस्तुर कॅम्प, शाळेसमोर) यांनी फिर्याद दिली आहे. आरोपींवर भारतीय न्याय संहिता २०२३ चे कलम ३१८(४) (फसवणूक करणे), ३१६(२) (विश्वासघात करणे) आणि ३(५) अन्वये गुन्हा नोंदवण्यात आला आहे.

पोलीस तक्रारीनुसार, आरोपी श्याम खैरे आणि त्याची पत्नी दिपाली खैरे यांनी फिर्यादी किरण कांबळे यांचा विश्वास संपादन केला. आरोपींनी ससून रुग्णालयात आपली मोठी ओळख असल्याचे सांगून फिर्यादीला ‘ससून हॉस्पीटलमध्ये शिपाई पदावर कायमस्वरूपी सरकारी नोकरी लावून देतो’ असे आमिष दाखवले.

या नोकरीच्या बदल्यात आरोपींनी फिर्यादीकडून वेळोवेळी रोख स्वरूपात आणि बँक खात्यावर ऑनलाइन पद्धतीने असे एकूण ३ लाख ५० हजार रुपये उकळले. पैसे दिल्यानंतरही अनेक महिने उलटून नोकरी न मिळाल्याने आणि दिलेले पैसे परत मागितले असता टाळाटाळ केल्याने फिर्यादीला आपली फसवणूक झाल्याचे लक्षात आले. आपली फसवणूक झाल्याचे स्पष्ट झाल्यानंतर पीडित किरण कांबळे यांनी बंडगार्डन पोलीस ठाण्यात धाव घेऊन रीतसर फिर्याद नोंदवली. पोलिसांनी पती-पत्नीविरुद्ध फसवणूक आणि विश्वासघाताचा गुन्हा नोंदवला आहे.