विसर्जन मिरवणुकीत पोलीस 'ऑन ड्युटी ४० तास'; सीपी अमितेश कुमार, सह आयुक्त संजय दराडे प्रत्यक्ष 'फिल्ड'वर -

Spread the love

तब्बल ३३ तास २७ मिनिटे चाललेली विसर्जन मिरवणूक शांततेत पार; १० हजारांहून अधिक पोलिसांचा तगडा बंदोबस्त!

पुणे: ऐतिहासिक आणि वैभवशाली गणेशोत्सवाची सांगता करत अनंत चतुर्दशीची मुख्य विसर्जन मिरवणूक शांततेत आणि शिस्तबद्ध वातावरणात पार पडली. शुक्रवारी, २५ सप्टेंबर २०२६ रोजी सकाळी ०८:४३ वाजता मानाच्या पहिल्या श्री कसबा गणपतीच्या आगमनाने सुरू झालेली मिरवणूक सलग ३३ तास २७ मिनिटे चालून दुसऱ्या दिवशी, २६ सप्टेंबर रोजी सायंकाळी १८:१० वाजता समाप्त झाली.

या कालावधीत पुणे शहर पोलीस आयुक्तालय कार्यक्षेत्रात ४,१७० सार्वजनिक आणि ६,२४,६८५ घरगुती गणपतींचे विसर्जन करण्यात आले. सुरक्षेच्या पार्श्वभूमीवर पोलीस आयुक्त अमितेश कुमार आणि सह पोलीस आयुक्त संजय दराडे स्वतः रस्त्यावर उतरून परिस्थितीवर लक्ष ठेवून होते.

मिरवणूक सुरळीत पार पाडण्यासाठी सुमारे १० हजार पोलिसांचा ताफा तैनात करण्यात आला होता. शुक्रवारी सकाळी ७ वाजल्यापासून पोलीस बंदोबस्तावर तैनात होते. त्यापूर्वी रात्रभर वाहतूक पोलिसांकडून बॅरिकेडिंग आणि अडथळे उभारण्याचे काम सुरू होते. पोलीस अंमलदार व अधिकाऱ्यांनी सलग ४० तासांपेक्षा जास्त वेळ रस्त्यावर उभे राहून चोख कर्तव्य बजावले.

मिरवणूक मार्गांवर गर्दी नियंत्रणासाठी लाऊडस्पीकरवरून सतत सूचना दिल्या जात होत्या. तसेच, लहान मुले व ज्येष्ठ नागरिकांच्या मदतीसाठी ठिकठिकाणी मदत केंद्र उभारण्यात आले होते. आपत्कालीन परिस्थितीसाठी रुग्णवाहिकांना वाट मोकळी करून देण्यासाठी पोलीस आणि कार्यकर्त्यांनी तत्परता दाखवली.

पोलिसांनी ढोल-ताशा पथकांसाठी यंदा नियमावली कडक केली होती. प्रत्येक मंडळासमोर ३ पथके (१५ ताशे व ४० ढोल) वाजवण्याची परवानगी होती, ज्याचे बहुतांश मंडळांनी पालन केले. सुरक्षेसाठी संपूर्ण विसर्जन मार्गावर सरकारी तसेच खासगी सीसीटीव्ही कॅमेऱ्यांचे जाळे अंथरण्यात आले होते. याशिवाय बॉम्ब शोधक व नाशक पथक, आरसीपी आणि क्यूआरटी पथके तैनात होती.

वाहतूक पोलिसांनी वाहतूक कोंडी टाळण्यासाठी विविध उपाययोजना राबवल्या असल्या, तरी काही भागांत वाहतुकीचा खेळखंडोबा पाहायला मिळाला. काही ठिकाणी वाहनचालकांनी पोलिसांचे बॅरिकेड्स तोडून पुढे जाण्याचा प्रयत्न केला, तर काही ठिकाणी वाहनचालक आणि मंडळाच्या कार्यकर्त्यांमध्ये शाब्दिक बाचाबाचीचे प्रसंग घडले.

मुख्य पोलीस बंदोबस्त: अतिरिक्त पोलीस आयुक्त (४), पोलीस उपायुक्त (१२), सहाय्यक पोलीस आयुक्त (२५), पोलीस निरीक्षक (१५०+), सहाय्यक निरीक्षक/उपनिरीक्षक (६००+), पोलीस अंमलदार (८,०००), होमगार्ड (१,०००), एसआरपीएफ (२ कंपन्या), बीडीडीएस, आरसीपी, क्यूआरटी व गुन्हे शाखेची विशेष पथके.

वाहतूक पोलीस बंदोबस्त: अतिरिक्त आयुक्त (१), पोलीस उपायुक्त (१), पोलीस निरीक्षक (१५), सहाय्यक निरीक्षक (४०), पोलीस अंमलदार (८००), ट्रॅफिक वॉर्डन (३००).

मानाच्या पाच गणपतींची विसर्जन मिरवणूक:

मानाच्या पाचही गणपतींनी लक्ष्मी रस्त्यावरून पारंपरिक वाद्ये आणि शिस्तबद्ध पथकांच्या गजरात वेळेत विसर्जन उरकले:

१) मानाचा पहिला – श्री कसबा गणपती: २५ सप्टेंबर रोजी सकाळी ०८:४३ वाजता मार्गस्थ; बेलबाग चौक (१०:३० ते १०:४०), अलका टॉकीज चौक (१५:१५ ते १५:३५); नटेश्वर घाटावर १६:४३ वाजता विसर्जन (एकूण वेळ: ०८ तास ०० मिनिटे).
२) मानाचा दुसरा – श्री तांबडी जोगेश्वरी गणपती: सकाळी ०९:१८ वाजता प्रारंभ; बेलबाग चौक (१०:३६ ते ११:३२), अलका चौक (१५:४६ ते १६:००); नटेश्वर घाटावर १७:०२ वाजता विसर्जन (एकूण वेळ: ०७ तास ४४ मिनिटे).
३) मानाचा तिसरा – श्री गुरुजी तालीम गणपती: सकाळी ०९:३९ वाजता प्रारंभ; बेलबाग चौक (१२:१६ ते १२:३५), अलका चौक (१६:११ ते १६:३७); नटेश्वर घाटावर १७:०५ वाजता विसर्जन (एकूण वेळ: ०७ तास २६ मिनिटे).
४) मानाचा चौथा – श्री तुळशीबाग गणपती: सकाळी ०९:३० वाजता प्रस्थापित; बेलबाग चौक (१३:४८ ते १४:०६), अलका चौक (१६:५४ ते १७:०८); पांचाळेश्वर घाटावर १७:४० वाजता विसर्जन (एकूण वेळ: ०८ तास १० मिनिटे).
५) मानाचा पाचवा – श्री केसरीवाडा गणपती: सकाळी ०९:२६ वाजता प्रारंभ; बेलबाग चौक (१५:०० ते १५:०५), अलका चौक (१७:३० ते १८:००); पांचाळेश्वर घाटावर १८:१२ वाजता विसर्जन (एकूण वेळ: ०८ तास ४६ मिनिटे).

प्रमुख पाच सार्वजनिक मंडळांचा राजेशाही थाट:

श्रीमंत दगडूशेठ हलवाई गणपती ट्रस्ट: दुपारी १६:१८ वाजता मिरवणूक सुरू; बेलबाग चौक (१६:२१ ते १६:२८), अलका चौक (१९:३० ते १९:५०); पांचाळेश्वर घाटावर रात्री २०:२७ वाजता विसर्जन (विक्रमी वेळ: ०४ तास ०९ मिनिटे).
हुतात्मा बाबू गेणू मंडळ: सायंकाळी १७:४३ वाजता प्रारंभ; बेलबाग चौक (१९:४९ ते २०:१४), अलका चौक (२६ सप्टेंबर ००:३५ ते ०१:०६); नटेश्वर घाटावर ०१:०५ वाजता विसर्जन (एकूण वेळ: ०७ तास २२ मिनिटे).
श्रीमंत भाऊसाहेब रंगारी गणपती ट्रस्ट: सायंकाळी १७:०० वाजता प्रारंभ; बेलबाग चौक (२१:३१ ते २१:५७), अलका चौक (२६ सप्टेंबर ०२:५० ते ०३:१५); पहाटे ०४:०८ वाजता मिरवणूक पूर्ण, सकाळी ०८:४५ वाजता जागेवरच विसर्जन (एकूण वेळ: ११ तास ०८ मिनिटे).
अखिल मंडई मंडळ: सायंकाळी १९:०५ वाजता प्रारंभ; बेलबाग चौक (१९:४९ ते २२:४७), अलका चौक (२६ सप्टेंबर ०३:३४ ते ०४:१२); पांचाळेश्वर घाटावर पहाटे ०४:३४ वाजता विसर्जन (एकूण वेळ: ०९ तास २९ मिनिटे).
जिलब्या मारुती मंडळ: सायंकाळी १८:०० वाजता प्रारंभ; बेलबाग चौक (१८:५४ ते १९:३०), अलका चौक (२३:५४ ते ००:२०); नटेश्वर घाटावर २६ सप्टेंबर रोजी मध्यरात्री ०१:१० वाजता विसर्जन (एकूण वेळ: ०७ तास ०० मिनिटे).