सह्याद्रीच्या दऱ्याखोऱ्यात रंगणार साहसी एसआरटी अल्ट्रा मॅरेथॉन स्पर्धा
पुणे: भारताच्या सुवर्ण इतिहासाची साक्ष देणाऱ्या सिंहगड-राजगड-तोरणा-लिंगाणा (SRTL) किल्ल्यांचे दर्शन घडवण्यासाठी या परिसरात एसआरटी अल्ट्रा मॅरेथॉन स्पर्धा येत्या शनिवारी दिनांक १३ डिसेंबर रोजी रंगणार आहे. यंदाचे स्पर्धेचे हे आठवे वर्ष आहे. सिंहगडाच्या पायथ्यापासून ते राजगड सर करून तोरणा किल्ल्यापर्यंत ते लिंगाणा सुळक्याच्या पायथ्यापर्यंत रायलिंग पठार असा मॅरेथॉनचा मार्ग असणार आहे. भारत, फ्रांस, इंग्लंड, अमेरिका, साऊथ कोरिया, स्वित्झर्लंड, नेदरलॅंड, नॉर्वे, इस्टोनिया या ९ देशातील खेळाडूंसह, भारतातील २४ राज्य आणि ५५ शहरातील एकूण ९५० पेक्षा अधिक स्पर्धक स्पर्धेत सहभागी झाले आहेत. ही मॅरेथॉन १०० किमी, ५३ किमी, २५ किमी व ११ किमी अशा वेगवेगळ्या विभागात घेतली जात आहे.
वेस्टर्न घाट रनिंग फाउंडेशनच्या वतीने या मॅरेथॉनचे आयोजन करण्यात आले आहे. शर्यतीत सहभागी होण्याऱ्या स्पर्धकांच्या सुरक्षेची विशेष काळजी घेतली जात असून त्याचबरोबर प्रथामिक सोय सुविधांची व्यवस्था केली गेली आहे. विजयी स्पर्धकांना विशेष सन्मान चिन्ह दिले जाणार आहे. पश्चिम घाटातील ऐतिहासिक वारसा लाभलेल्या आणि नैसर्गिक सौंदर्याने नटलेल्या या परिसरात ही १०० किमीची मॅरेथॉन स्पर्धा स्पर्धकांसाठी अविस्मरणीय अनुभव ठरणारी आहे अशी माहिती संस्थेचे अध्यक्ष दिग्विजय जेधे यांनी दिली.
एसआरटीएल अल्ट्रा मॅरेथॉन ही सिंहगड-राजगड-तोरणा-लिंगाणा किल्ल्यांना जोडणारी प्राचीन मार्गाची एक रोमांचकारी मॅरेथॉन आहे. स्पर्धेत गोळेवाडी (डोणजे) ते सिंहगड ११ किमी, डोणजे-सिंहगड ते राजगड २५ किमी, डोणजे-तोरणा ५३ किमी आणि डोणजे ते लिंगाणा १०० किमी अशा चार अंतर श्रेणीमध्ये ही स्पर्धा आहे. वेस्टर्न घाट रनिंग फाउंडेशन हे इंटरनॅशनल ट्रेल रनिंग असोसियेशनची सदस्य आहे. एसआरटी अल्ट्रा ही स्पर्धा वेळेत पुर्ण करणारया स्पर्धकांना फ्रांस मधील UTMB पात्रतेसाठी अवश्यक गूण मिळतात.
छत्रपती शिवरायांच्या व त्यांच्या मावळ्यांच्या पराक्रमाची साक्ष देणाऱ्या सिंहगड, राजगड, तोरणा आणि लिंगाणा गडकिल्ल्यांच्या सानिध्यातील ही स्पर्धा पुर्वीच्या काळी प्रवास,व्यापार शेतीसाठी वापरलेला हा मार्ग ऐतिहासिक पाऊलखुणांची आठवण करून देणारा आहे. रोजच्या धावपळीच्या आयुष्यातून थोडासा वेळ काढून स्वतःच्या आरोग्यासाठी व आनंदासाठी वेळ काढणे महत्त्वाचे झाले आहे. एसआरटीएल मॅरेथॉन सांस्कृतिक, ऐतिहासिक आणि आरोग्य अशा तिन्ही बाबींचा समन्वय साधणारी स्पर्धा आहे. महाराष्ट्र राज्य पुरातत्व विभाग तसेच वन विभाग, पर्यटन विभाग, पुणे पोलीस व पुणे जिल्हाधिकारी कार्यालय यांच्या विशेष सहकार्याने हि स्पर्धा दरवर्षी यशस्वी पार पडते.
८व्या वर्षीचे विशेष आकर्षण: भारतातील सर्वात अव्वल माउंटन ट्रेल रनर म्हणजे दार्जीलिंगचे हेमंत लिंबू व सोम बहादूर थमी यंदा पुन्हा एकदा विक्रम करायला येत आहेत. त्यांचा विक्रम मोडण्यासाठी पालघरचा प्रसिद्ध धावपट्टू विशाल वालवी व उत्तराखंडचा संजय नेगी हे सुद्धा सज्ज झाला आहे. त्यांच्या बरोबरीने यंदा महिलांच्या श्रेणीमध्ये नविन राष्ट्रीय विक्रम करण्यासाठी राखी राय, समजाना राय, व सून माया लिंबू या ३ महिला दार्जिलिंगच्या धावपट्टू सह्याद्रीमध्ये पहिल्यांदाच येत आहेत. त्यामुळे भारतीय अल्ट्रा ट्रेल रननरमध्ये यंदा कोण किती वेळामध्ये ही मॅरेथॉन पार करणार अशी उत्सुकता निर्माण झालेली आहे.
एसआरटी अल्ट्रा मॅरेथॉन स्पर्धेचे आयोजन अध्यक्ष दिग्विजय जेधे, विश्वस्त अनिल पवार, महेश मालुसरे, मंदार मते, ॲड. मारूती गोळे, अमर धुमाळ, ॲड. राजेश सातपुते, तसेच फाउंडेशनच्या ५०० स्वयंसेवकांनी यासाठी अथक परिश्रम केले आहे.
