लष्कर पोलीस ठाण्यात गुन्हा दाखल : फिर्यादी भारतीय नसल्याचे पोलीस व निवडणूक आयोगाकडे केले अर्ज
पुणे : पुण्यामधील प्रसिद्ध ‘कोहिनूर हॉटेल’च्या मालकाकडे तब्बल १८ कोटी रुपयांची खंडणी मागण्यात आल्याचा प्रकार समोर आला आहे. कोहिनूर हॉटेलचे मालक अली जाफरी हे भारतीय नाहीत आणि ते बनावट दस्तऐवजाच्या आधारे भारतात राहात असल्याचे अर्ज पोलीस व निवडणूक अधिकाऱ्यांकडे करण्यात आलेले होते. हा अर्ज मागे घेण्यासाठी १८ कोटी रुपयांची खंडणी मागण्यात आली. तसेच, पैसे न दिल्यास पोलिसांमार्फत त्रास देऊन मालमत्ता कशा विकता ते पाहतो अशी धमकी दिल्याचे फिर्यादीत नमूद करण्यात आले आहे. हा प्रकार एम. जी. रस्त्यावरील अकबर रेडियन प्लाझा येथील आफिस नंबर २०३ व २०४ येथे २०२४ पासून आजतागायत घडला.
समिर मोतीलाल मुजुमदार (वय ४९, रा. प्लॅट नंबर ५, दुसरा मजला, पदमजी पार्क, नाना पेठ) याच्यावर गुन्हा दाखल करण्यात आला आहे. याप्रकरणी अली अलीअबकर जाफरी (वय ६४) यांनी फिर्याद दिली आहे. लष्कर पोलीस ठाण्यात भान्यासं ३०८ (२) (३), ३५१ (२) (३) अन्वये गुन्हा नोंदवण्यात आला आहे. पोलिसांकडून मिळालेल्या माहितीनुसार, आरोपी आणि फिर्यादीची एकमेकांशी चांगली ओळख आहे. फिर्यादी मुजुमदार याला अधून मधून मदत करीत होते. मात्र, त्यांनी ही मदत थांबविली. त्यावरून आरोपीने फिर्यादीच्या मालमत्तेमध्ये त्याचा सासूचा वाटा असल्याचा दावा केला होता. हा वाटा देण्यास फिर्यादीने नकार दिला होता. त्यावेळी मुजुमदार याने जाफरी यांना ‘तुम्ही भारतात कसे राहता हे मी पाहतो’ अशी दमदाटी केली. तसेच त्याने फिर्यादी जाफरी व त्यांचा काही वर्षांपूर्वी निधन झालेला भाऊ यांच्याविरुध्द पोलीस आणि भारतीय निवडणूक आयोगाकडे तक्रार अर्ज केलेला होता.
जाफरी भारतीय नागरीक नाहीत. ते बनावट दस्तऐवज भारतीय सरकारला सादर करुन भारतात बेकायदा पद्धतीने राहत आहेत, असे या अर्जात नमूद करण्यात आलेले होते. या अर्जाची चौकशी सुरु असताना आरोपी मुजुमदार याने फिर्यादी जाफरीला प्रत्यक्ष भेटून अर्ज मागे घेण्यासाठी १८ कोटी रुपयांची मागणी केली. पैसे देण्यास फिर्यादीने नकार दिला असता त्याने ‘तुम्हाला पोलिसांमार्फत त्रास तर देणारच, परंतु तुमच्या मालमत्ता तुम्ही कशा विकता, हे मी पहातो. एक तर गेला तुला पण बघुन घेतो’ अशी धमकी दिली.
त्यानंतर आरोपी मुजुमदार याने दारा खंबाटा याची मुलगी वाबिज लिमतवाला व नातेवाईक महिला जास्मीन बागमार, नेव्हील परडीवाला यांची पावर ऑफ अर्टनी घेतली. त्याव्दारे त्यांचे ३० वर्षांपूर्वी फिर्यादीसोबत झालेल्या जमिन व्यवहारांचा आधार घेतला. फिर्यादी यांच्या विरुद्ध आरोपी मुजुमदार याने बनावट कागदपत्र तयार करुन त्याव्दारे वरील व्यक्तींची मालमत्ता हडप केल्याचा अर्ज पोलिसांकडे करण्यात आलेला आहे. तसेच, फिर्यादीला समक्ष भेटून तसेच व्हॉटस्अपवर मॅसेज करुन वेळोवेळी ब्लॅकमेल करुन १८ कोटी रुपयांची बेकायदेशीर पैशाची मागणी केल्याचे जाफरी यांनी दिलेल्या फिर्यादीत नमूद करण्यात आलेला आहे. या प्रकरणाचा पुढील तपास लष्कर पोलिसांकडून सुरु आहे.
#PuneNews #BreakingNews #CrimeNews #BlueNileHotel #kohinoorHotel #ExtortionCase #PuneCrime #PoliceInvestigation #MGRoadPune #AliJafri #PuneUpdates #MaharashtraNews #IndianNews #FakeDocuments #Extortion #NewsAlert #ViralNews #DigitalNews #LegalNews #PropertyDispute #TrendingNow
