स्वारगेट पोलीस ठाण्यात गुन्हा दाखल : ‘पुनर्विकासाचा भार’ कोणावर?
पुणे : दिवंगत ज्येष्ठ साहित्यिक ना. स. इनामदार यांच्या बंगल्याचा ताबा घेण्याचा प्रयत्न करण्यात आल्याचा धक्कादायक प्रकार समोर आला आहे. झेप, राऊ, मंत्रावेगळा, शाहेनशहा अशा अनेक कादंबऱ्यांचे लेखक आणि अखिल भारतीय मराठी साहित्य संमेलनाचे माजी अध्यक्ष असलेल्या साहित्यिकाच्या घरावर बुलडोजर चालवण्याचा प्रयत्न झाला. याप्रकरणी स्वारगेट पोलीस ठाण्यात गुन्हा दाखल करण्यात आला आहे. हा प्रकार ३१ ऑक्टोबर २०२५ रोजी सकाळी साडे अकराच्या सुमारास घडला.
देवेश जैन (रा. मार्केट यार्ड), कंत्राटदार संजय लक्ष्मण केंजळे (रा. दांडेकर पूल), जयेश फूलपगार, जेसीबी चालक अशा सर्वांवर भारतीय न्याय संहिता ३२९ (४), ३२४ (४), ३ (५) अन्वये गुन्हा नोंदवण्यात आला आहे. याप्रकरणी सुभाषचंद्र गोपाळराव आरोळे (वय ८०, रा. झेप बंगला, ४२७/७८, टीमवी कॉलनी, गुलटेकडी) यांनी फिर्याद दिली आहे. आरोळे हे दिवंगत साहित्यिक ना. स. इनामदार यांचे जावई आहेत. इनामदार यांच्या मृत्यूपश्चात आरोळे कुटुंब याठिकाणी राहण्यास आहे.
पोलिसांकडून मिळालेल्या माहितीनुसार, जैन आणि आरोळे यांच्यामध्ये खरेदीखत झालेले आहे. आरोळे यांनी कागदोपत्री साडेसात कोटी रुपयांना हा बंगला विकला. खरेदीखत झाल्यानंतर तीन महिन्यात ताबा देण्याचे ठरले होते. मात्र, अद्याप ताबा झालेला नाही. त्यानंतर, आरोळे यांनी जैन यांच्या खरेदीखताविषयी आक्षेप घेतलेले आहेत. सध्या याविषयी न्यायालयात खटला सुरू आहे. सध्या दोन्ही बाजूने चर्चा सुरू आहेत. दरम्यान, पोलिसांना देखील याविषयी न्यायालयात अहवाल सादर करावा लागणार आहे. हा सर्व प्रकार सुरू असतानाच जैन, केंजळे, फूलपगार आदी माणसे ३१ ऑक्टोबर रोजी कोणीतीही पूर्वसूचना न देता बंगल्याचा ताबा घेण्यासाठी गेले. जबरदस्तीने बंगल्याच्या बांधकामाचे कंपाऊंड, लोखंडी गेट तोडण्यात आले. तसेच, बंगल्याचे नुकसान करून ताबा घेण्याचा प्रयत्न करण्यात आल्याचे फिर्यादीत नमूद करण्यात आले आहे. यासंदर्भात पोलीस आयुक्त अमितेश कुमार यांच्याकडे तक्रार करण्यात आली होती. पोलीस आयुक्तांनी या तक्रारीची गंभीर दखल घेत तात्काळ कारवाईचे आदेश दिले. त्यानंतर, संबधितांवर गुन्हा नोंदवण्यात आला आहे.
==चौकट==
ना. स. इनामदार यांनी झेप नावाची पहिली कादंबरी लिहिली होती. त्यामुळे त्यांना प्रसिद्धी प्राप्त झाली होती. याच कादंबरीवरुन इनामदार यांनी आपल्या बंगल्याचे बांधकाम पूर्ण केल्यानंतर त्याला झेप हे नाव दिले होते.
