मिठाई विक्रेत्याला हनी ट्रॅपमध्ये अडकवण्याचा प्रयत्न
फेसबुकवरील ओळख, पतीही सामील, उकळली खंडणी, तरुणीला अटक, फरासखाना पोलिसांनी कारवाई
पुणे : फेसबुकवर झालेल्या ओळखीतून एका मिठाई विक्रेत्याला हनी ट्रॅपमध्ये अडकविण्याचा प्रयत्न करुन त्याच्याकडून पैसे घेतले. त्याला हॉटेलमध्ये घेऊन जाऊन अडविण्याचा प्रयत्न करुन त्याच्याकडे २ लाख रुपयांची खंडणी मागितल्याचा प्रकार समोर आला आहे. खंडणीचे पैसे घेण्यासाठी येणार्‍या महिलेला पकडण्यासाठी पोलिसांनी सापळा रचला होता. परंतु, या महिलेने दुकानात न येता पोलिसांना गुंगारा दिला. त्यानंतर फरासखाना पोलिसांनी मध्यरात्री या महिलेला अटक केली. तिच्याबरोबर तिचा पतीही यात सहभागी असल्याचे उघड झाले असून पतीनेच दुकानात पोलीस असल्याचे सांगितल्याने ती दुकानात आली नसल्याचे तपासात निष्पन्न झाले.
याबाबत एका ४५ वर्षाच्या मिठाई विक्रे फरासखाना पोलीस ठाण्यात फिर्याद दिली आहे. त्यावरुन पोलिसांनी स्नेहा मोहित कदम (वय ३०, रा. सांगली) असे या महिलेचे नाव आहे. याबाबत पोलिसांनी दिलेल्या माहितीनुसार, फिर्यादी यांचे लक्ष्मी रोडवर मिठाईचे दुकान आहे. फेसबुकवर त्यांची स्नेहा कदम या तरुणींशी ओळख झाली. ओळखीनंतर एकदा तिने त्यांच्याकडे २४ सप्टेंबर रोजी ४ हजार रुपये मागितले. त्यांनी गुगल पेवर ४ हजार रुपये पाठविले. त्यानंतर २५ सप्टेंबर रोजी तिने फोन करुन कोरेगाव पार्क येथील ओ हॉटेलवर बोलवले. रात्री साडेबारा वाजता ते हॉटेलबाहेर भेटले. त्यानंतर तिने कॉफी पिणार का असे विचारले. आता इतक्या रात्री कोठे कॉफी मिळणार असे ते म्हणाल्यावर तिने मी आता बहिणीच्या घरी हिंजवडीला जाते. इतक्या रात्री कशी जाणार, आज येथेच हॉटेलमध्ये रहा़ असे म्हणून त्यांनी तिचे हॉटेलचे बुकींग केले. रुममध्ये गेल्यावर तिने दारु पिणार का असे विचारले. त्याला त्यांनी नकार दिला. त्यानंतर तिने एक लाख रुपये दे मी तुझ्याबरोबर सेक्स करते, असे म्हणाली. त्यालाही त्यांनी नकार देऊन ते घरी निघून आले. त्यानंतर त्याच दिवशी दुपारी ते दुकानात असताना ती अचानक दुकानात आली. तिने हॉटेलमध्ये झालेल्या प्रकाराची भिती दाखवुन दुकानात तमाशा करेल, असे धमकावले. त्यांनी प्रकरण मिटविण्यासाठी तिला ७० हजार रुपये दिले. दुकानातील गल्ल्यातील पैसे व मिठाईचे बॉक्स ती जबरदस्तीने घेऊन गेली. त्यानंतर ३ आॅक्टोंबर रोजी तिने हे प्रकरण मिटवायचे असेल तर २ लाख रुपये दे अशी मागणी केली. त्याची त्यांनी फरासखाना पोलिसांकडे तक्रार केली. तिला रंगेहाथ पकडण्यासाठी पोलिसांनी बनावट नोटांचे बंडल तयार केले़ मिठाईच्या दुकानात सापळा रचला़ पण या तरुणीने दुकानात पैसे घेण्यास येण्यास नकार दिला़ तिने गुगल पेवर पैसे देण्यास सांगितले़ फिर्यादी यांनी आपली लिमिट फक्त २५ हजार रुपये असल्याचे सांगून पैसे देण्यास नकार दिला़ फरासखाना पोलिसांनी या महिलेला मध्यरात्री अटक केली आहे़ सहायक पोलीस निरीक्षक शितल जाधव तपास करीत आहेत.
