जोडीदाराला अंतर्बाह्य स्वीकारा आणि आपलं नातं आणखी घट्ट करा
मुंबई : कधी कधी प्रत्येक नात्यात असा काळ येतो, जेव्हा पतीपत्नीला विवाह बंधन खरोखरीच बंधन वाटू लागते. आपण या नात्याच्या बेडीत अडकून पडलो आहोत अशी भावना त्यांच्यामध्ये निर्माण होते. अशा परिस्थितीत नात्यातील प्रेम आणि जिव्हाळा टिकवण्यासाठी काही गोष्टी नियमितपणे करणे गरजेचं आहे. आपल्या जोडीदाराला अंतर्बाह्य स्वीकारा आणि एकमेकांच्या आवडीनिवडी जोपासा… मग बघा नातं कसं खुलतं ते…
लग्न टिकवण्यासाठी किंवा नात्यात पार्टनरसोबत आनंदी राहण्यासाठी कोणतंही ठराविक सूत्र नसतं. मात्र, काही गोष्टी नात्याचा पाया मजबूत करण्यासाठी नक्कीच मदत करू शकतात. अशा काही महत्त्वाच्या गोष्टींबद्दल जाणून घेऊया ज्या जोडप्यांना भावनिकदृष्ट्या जोडून ठेवतात आणि नात्यात ताजेपणा कायम ठेवतात.
- फक्त चेहऱ्यावर नाही, तर चांगुलपणावर प्रेम करा
बाह्य सौंदर्यावर प्रेम टिकत नाही. जर तुम्ही एखाद्या व्यक्तीवर फक्त त्याच्या रंग-रूपामुळे प्रेम करत असाल, तर असं प्रेम फार काळ टिकत नाही. उलट अशा नात्यात राहणं नंतर कंटाळवाणं वाटू लागतं. त्यामुळे तुमच्या पार्टनरच्या चांगुलपणावर प्रेम करा, कारण त्यांचं व्यक्तिमत्त्व आणि विचार हेच खरे महत्त्वाचे असतात.
- सवयी स्वीकारा
खरी प्रेम भावना ही व्यक्तीच्या सवयी, विचारसरणी आणि मानसिकतेवर आधारित असते. अशा गोष्टी दोन व्यक्तींना कायमच एकत्र ठेवतात. जर तुम्ही एकमेकांच्या सवयींना स्वीकाराल, तर नात्यात प्रेम संपण्याचा प्रश्नच येत नाही.
- पार्टनरच्या प्राधान्यक्रमांना समजून घ्या
प्रत्येकजण आपल्या पार्टनरच्या आयुष्यातील पहिली प्राधान्यक्रम (प्रायोरिटी) बनायला इच्छुक असतो. पण हीच अपेक्षा कधीकधी नात्यात तणाव आणते. त्यामुळे पार्टनरवर आपले विचार लादू नका, तर त्यांचं प्राधान्य समजून त्याला आदर द्या.
- पार्टनरच्या प्रयत्नांची दखल घ्या
तुमचा पार्टनर तुमच्यासाठी छोट्या-छोट्या गोष्टी करतोय, याचं कौतुक करणं खूप महत्त्वाचं आहे. त्यांच्या प्रयत्नांची दखल घ्या आणि त्यांची स्तुती करा. तक्रारी करण्याऐवजी कौतुकाची सवय लावा, यामुळे नात्यात एक वेगळी ऊर्जा येईल आणि तुमचं नातं अधिक सुंदर होईल.
