वेश्या व्यवसायाला लावलेल्या दोन तरुणींची सुटका
ब्युटी पार्लरचे कामाला लावण्याचे दाखविले होते आमिष, भारती विद्यापीठ पोलिसांची कामगिरी
पुणे : ब्युटी पार्लरचे कामाला लावण्याचे आमिष दाखवून पश्चिम बंगालहून पुण्यात आणून वेश्या व्यवसायाला लावलेल्या तरुणींसह दोघींची भारती विद्यापीठ पोलिसांनी सुटका केली. पोलिसांनी दलालाला अटक केली आहे.
राजू चिद्रवार (पाटील) (वय २५, रा. आंबेगाव पठार) असे अटक केलेल्या दलालाचे नाव आहे. त्याची पत्नी मिरा राजू चिद्रवार ही पळून गेली असून पोलीस तिचा शोध घेत आहेत. याबाबत एका २२ वर्षाच्या तरुणीने भारती विद्यापीठ पोलिसांकडे फिर्याद दिली आहे. हा प्रकार २०२३ पासून आतापर्यंत बुधवार पेठ, आंबेगाव पठार, आंळदी येथील लॉजवर घडला आहे.
याबाबत पोलिसांनी दिलेल्या माहितीनुसार, आरोपी राजू चिद्रवार व मिरा चिद्रवार यांनी फिर्यादी यांना ब्युटी पार्लरचे काम लावून देते, असे आमिष दाखवून पश्चिम बंगालमधील गावावरुन पुण्यात आले. ब्युटी पार्लरचे कामाला न लावता या तरुणीला वेश्या व्यवसाय करण्यास भाग पाडले. त्यातून मिळणारे पैसे स्वत: करीता वापरले. तिला त्यांनी डांबुन ठेवले. शिवीगाळ, मारहाण करुन धमकावले, तिचा छळ केला. तसेच तिला वेगवेगळ्या ठिकाणी घेऊन जाऊन वेश्या व्यवसाय करण्यास भाग पाडले. गेल्या आठवड्यात आंबेगाव पठार येथे त्यांनी आणखी एका तरुणीला तेथे आणले. तिच्याकडूनही ते वेश्या व्यवसाय करवुन घेऊ लागले होते. या तरुणीला संधी मिळाल्यावर तिने पोलीस नियंत्रण कक्षाला फोन केला. त्यावरुन भारती विद्यापीठ पोलिसांनी आंबेगाव पठार येथे शोध घेऊन फिर्यादी व तिच्याबरोबर आणखी एका तरुणींची सुटका केली आहे. वरिष्ठ पोलीस निरीक्षक राहुल खिलारे तपास करीत आहेत.
