वेळोवेळी केले लैंगिक अत्याचार : गोड बोलून सोन्याचा राणीहारही बळकावला!
पुणे : उपचार घेण्यासाठी रुग्णालयात आलेल्या महिला रुग्णाशी ओळख वाढवून तिला जाळ्यात ओढणाऱ्या डॉक्टरने तिच्यावर लैंगिक अत्याचार केल्याचे समोर आले आहे. तिच्यावर रुग्णालयातच तसेच विविध ठिकाणी नेऊन जबरदस्तीने शारीरिक संबंध प्रस्थापित करण्यात आले. पिडीत महिलेच्या तक्रारीवरून पाटस पोलीस ठाण्यात गुन्हा दाखल करण्यात आला आहे. या डॉक्टरला पोलिसांनी बेड्या ठोकल्या आहेत.
डॉ. सुनिल नामदेव झेंडे (मुळ रा. दिवे ता. पुरंदर, सध्या रा. वरवंड ता. दौंड) असे अटक करण्यात आलेल्या डॉक्टरचे नाव आहे. पोलिसांनी दिलेल्या माहितीनुसार, वरवंड येथे डॉ. झेंडे हा धन्वंतरी अॅक्युप्रेशर सेंटर आयुर्वेदिक दवाखाना नावाचे रुग्णालय चालवतो. झेंडे याच्या धन्वंतरी रुग्णालयामध्ये २१ ऑगस्ट २०२४ रोजी पीडित महिला उपचार घेण्यासाठी आली होती. तिला पाठीवर गाठ आलेली होती. आरोपी डॉक्टरने तिच्याशी गोड बोलून तिला जवळ ओढत मिठी मारली. तिने आरोपीला ‘डॉक्टर तुम्ही असे काय करता? मी माझे घरातील लोकांना सांगेल’, असे म्हणत त्याच्यापासून सुटका करून घेण्याचा प्रयत्न केला. त्यावेळी त्याने ‘मला तु मला आवडतेस. आपण दोघे बाहेर फिरायला जाऊ’ असे म्हणत पुन्हा लगट करण्याचा प्रयत्न केला.
या महिलेने आरोपीच्या या मागणीला नकार दिला. आरोपीने त्यानंतर बळजबरीने तिला दवाखान्याच्या आतील खोलीत नेले. तेथे तिच्यावर अत्याचार करण्यात आले. त्यानंतर, या महिलेला ‘कोणाला सांगू नकोस. नाहीतर मी तुझी बदनामी करीन’ अशी धमकी दिली. त्यानंतर, आरोपी डॉक्टरने १९ नोव्हेंबर २०२४ पर्यंत वेगवेगळ्या ठिकाणी नेऊन अत्याचार केले. आरोपीने तिला धकमावत तिच्याकडे सोन्याचा हार मागितला. पिडीत महिलेने भितीपोटी अडीच तोळ्यांचा सोन्याचा राणीहार घरात कोणास काही न सांगता त्याला आणून दिला. त्यानंतर, दहा दिवसानंतर सोन्याचा राणीहार परत मागितला. पण, डॉक्टरने हा सोन्याचा हार परत देण्यास नकार दिला. तिला वारंवार ‘तुला तुझा राणीहार पाहीजे असेल, तर तु माझ्या सोबत शारीरिक संबंध ठेव. अन्यथा मी तुझ्या घरच्यांना याबाबत सांगेन अशी धमकी दिल्याचे फिर्यादीत नमूद करण्यात आले आहे.
पिडीत महिलेने यासंदर्भात पाटस पोलीस चौकीत फिर्याद दाखल केली. पोलिसांनी मंगळवारी (दि. १०) संबंधित डॉक्टरवर बलात्काराचा गुन्हा दाखल करून त्याला अटक केली. त्याला दौंड न्यायालयात हजर केले असता न्यायालयाने १६ डिसेंबर पर्यंत पाच दिवसांची पोलीस कोठडी सुनावली. पुढील तपास पोलीस उपनिरीक्षक सलीम शेख करीत आहेत.
