भावाला पायलट बनवण्याचे स्वप्न अपूर्णच राहिले; पिंकी माळीची मन हेलावून सोडणारी कहाणी
पुणे : आयुष्यभर वडिलांचे अपूर्ण स्वप्न पूर्ण करण्याची जिद्द उराशी बाळगणारी आणि भावाला पायलट बनवण्याचे स्वप्न पाहणारी पिंकी शिवकुमार माळी (वय २९) काळाच्या क्रूर डावात हरपली. उपमुख्यमंत्री अजित पवार यांच्यासोबत प्रवास करत असलेल्या अपघातग्रस्त विमानात फ्लाईट अटेंडंट म्हणून कार्यरत असलेल्या पिंकीलाही आपले प्राण गमवावे लागले. तिच्या जाण्याने माळी कुटुंबावर दुःखाचा डोंगर कोसळला आहे.
पिंकीच्या आयुष्याची सुरुवात संघर्षातून झाली होती. तिचे वडील शिवकुमार माळी हे एकेकाळी तत्कालीन पंतप्रधान व्ही. पी. सिंग यांच्या विमानाशी संबंधित सेवेत कार्यरत होते. मात्र एका क्षुल्लक घटनेनंतर त्यांना नोकरी गमवावी लागली. त्या अपमानाची आणि अपूर्णतेची जखम त्यांनी आयुष्यभर मनात ठेवली. हीच वेदना पिंकीने जवळून पाहिली होती.
“पप्पा, तुमचं स्वप्न मी पूर्ण करीन…”
हे वाक्य पिंकी अनेकदा वडिलांना म्हणायची.
बारावीपर्यंत शिक्षण घेतल्यानंतर तिने एअर होस्टेस होण्याचा निर्णय घेतला. सुरुवातीला तीन वर्षे तिने इंडियन एअरलाईन्समध्ये काम केले. त्यानंतर खासगी विमान कंपनीत फ्लाईट अटेंडंट म्हणून रुजू झाली. वडिलांचे स्वप्न तिने पूर्ण केले, पण तिचे स्वतःचे एक मोठे स्वप्न अजून अपूर्णच होते— भावाला पायलट बनवण्याचे.
पिंकीचे लग्न झालेले होते. तिचे पती पुण्यात लार्सन अँड टुब्रो कंपनीत मॅनेजर म्हणून कार्यरत आहेत. कुटुंबात मोठी बहीण कोकिलाबेन रुग्णालयात नर्स म्हणून काम करते. माळी कुटुंबासाठी पिंकी ही अभिमानाची बाब होती.
मागील चार-पाच दिवसांपासून पिंकी उपमुख्यमंत्री अजित पवार यांच्या प्रचार दौऱ्यावर चार्टर्ड विमानातून प्रवास करत होती. मंगळवारी रात्री तिने घरी फोन करून प्रवासाची माहिती दिली होती. अजित पवार यांच्याशी फोनवर बोलण्याची संधीही तिने वडिलांना दिली होती. त्यानंतर काही तासांतच सगळं बदलून गेलं.
“टीव्हीवर विमान अपघाताची बातमी पाहिली आणि आमच्या पायाखालची जमीन सरकली…
पिंकी गेल्याचं समजताच आमच्यावर आभाळ कोसळलं,” असे सांगताना शिवकुमार माळी यांना भावना आवरता आल्या नाहीत.
विमान कंपनीकडून अद्याप कोणताही स्पष्ट संपर्क झाला नसल्याचेही त्यांनी सांगितले. “विमानात नेमकी काय चूक होती, याची सखोल चौकशी झाली पाहिजे. माझी मुलगी परत येणार नाही, पण सत्य समोर आलंच पाहिजे,” अशी व्यथाही त्यांनी व्यक्त केली.
वडिलांचे स्वप्न पूर्ण करणारी मुलगी, भावासाठी मोठी स्वप्नं पाहणारी बहीण आणि कुटुंबाचा आधार… पिंकी माळी आज आठवणीतच उरली आहे. तिची कहाणी केवळ एका अपघाताची नाही, तर स्वप्नं, संघर्ष आणि अपूर्णतेची वेदना सांगणारी आहे.
