पुणे : पवई येथील स्टुडिओमध्ये लहान मुलांना ओलीस ठेवण्याच्या प्रकरणात सहभागी असलेल्या रोहित आर्य याचा अंत्यसंस्कार शुक्रवारी मध्यरात्री पुण्यातील वैकुंठ स्मशानभूमीत करण्यात आला. विशेष म्हणजे, या अंत्यसंस्कारावेळी कोणतेही धार्मिक विधी पार पाडण्यात आले नाहीत. रात्री २ वाजून २४ मिनिटांनी विद्युत दाहिनीमध्ये त्याचा पार्थिव देह अंत्यविधीसाठी सुपूर्द करण्यात आला.
या वेळी केवळ त्याची पत्नी अंजली आर्य, मुलगा, एक नातेवाईक आणि मुलाचे दोन मित्र इतकेच लोक उपस्थित होते. मुंबईतील जेजे रुग्णालयातून मृतदेह पुण्यात आणल्यानंतर अत्यंत साधेपणाने अंत्यविधी पार पडले. रोहितच्या कृत्यामुळे निर्माण झालेल्या सामाजिक दबावामुळे आणि नकारात्मक चर्चेमुळे नातेवाईकांनी दूर राहणे पसंत केले. परिणामी, केवळ चार-पाच लोकांच्या उपस्थितीत घाईघाईत अंत्यसंस्कार करण्यात आले.
रोहित आर्यविरुद्ध दाखल असलेल्या अपहरण आणि हत्येच्या गुन्ह्याचा तपास गुन्हे शाखा युनिट आठचे प्रभारी पोलीस निरीक्षक लक्ष्मीकांत साळुंखे यांच्याकडे देण्यात आला आहे. तर, पोलिसांच्या गोळीबारात रोहितचा मृत्यू झाल्याने त्या घटनेचा तपास युनिट दोनचे निरीक्षक दिलीप तेजनकर आणि विशाल राजे यांचे पथक करत आहे. या मृत्यूची न्यायालयीन चौकशी होणार असल्याची माहिती पोलिसांनी दिली.
पोलिसांनी रोहितशी साधारण दीड तास संवाद साधला होता. मात्र, तो संभाषणादरम्यान खूप अस्वस्थ आणि चलबिचल अवस्थेत होता. काही मिनिटांनंतर तो वारंवार आत जात असे आणि परिस्थिती पाहत असे. यामुळे सलग संवाद साधण्यात अडचणी येत होत्या. पोलिसांनी “माजी मंत्र्यांशी संपर्क होत नाही” असे सांगितल्यावर रोहितने “मला तुमच्यावर विश्वास नाही” असे म्हणत संवाद बंद केला, असे पोलिस सूत्रांनी सांगितले.
घटनास्थळी पोलिसांना एअरगन, ज्वलनशील द्रव्ये आणि इतर संशयास्पद वस्तू सापडल्या. या वस्तू त्याने कुठून आणि कशा मिळवल्या, याचा शोध सुरू आहे. रोहितने त्या एअरगनचा वापर केला होता का, तसेच त्याने आणलेले रसायन नेमके कोणते होते, हे अद्याप स्पष्ट झालेले नाही. सर्व वस्तू फॉरेन्सिक तपासणीसाठी पाठवण्यात आल्या असून, त्याच्या अहवालानंतर अनेक प्रश्नांची उत्तरे मिळतील, अशी माहिती अधिकाऱ्यांनी दिली.
रोहित आर्यने यापूर्वी शिक्षण विभागाकडे केलेल्या कामाचे पैसे आणि श्रेय न मिळाल्याचा आरोप केला होता. या प्रकरणात काही राजकीय व्यक्तींची नावे पुढे येत असल्याने, गुन्हे शाखेच्या तपासातून त्याच्या कृतीमागील खरा उद्देश उघड होईल का, याबाबत चर्चा सुरू आहे. रोहितच्या मृत्यूवर अनेक प्रश्नचिन्ह उपस्थित होत असून, पारदर्शक तपास व्हावा म्हणून हे प्रकरण गुन्हे शाखेकडे सोपवण्यात आले आहे, अशी माहिती एका वरिष्ठ अधिकाऱ्याने दिली.
