महिला कैद्यांसाठी आनंद आणि प्रेरणेचं नवं व्यासपीठ
पुणे : कारागृह म्हणजे फक्त शिक्षेचं ठिकाण नाही, तर सुधारणा आणि नव्या सुरुवातीचं केंद्रही ठरू शकतं. याच संकल्पनेतून येरवडा महिला कारागृहात ‘रेडिओ तरंग’ या विशेष उपक्रमाचा शुभारंभ करण्यात आला आहे. या उपक्रमाचा उद्देश महिला कैद्यांच्या मनात नवी उमेद निर्माण करणे आणि त्यांना मानसिक, सामाजिक व सांस्कृतिक दृष्ट्या बळकटी देणे हा आहे.
महिला कैद्यांना समाजापासून वेगळं पडल्यामुळे उद्भवणाऱ्या एकटेपणावर मात करता यावी आणि त्यांना सकारात्मक वातावरण मिळावं यासाठी हा रेडिओ कक्ष सुरू करण्यात आला आहे. या कक्षातून प्रसिद्ध वक्त्यांची प्रेरणादायी भाषणे, योग आणि ध्यानविषयक सत्रं, भक्तिगीते, मनोरंजनात्मक कार्यक्रम, महिला सक्षमीकरण आणि कायदेविषयक माहिती यांचे प्रसारण केले जाणार आहे.
या रेडिओ कक्षाचे उद्घाटन माजी आयपीएस अधिकारी आणि इंडिया व्हिजन फाउंडेशनच्या अध्यक्षा किरण बेदी यांच्या हस्ते झाले. यावेळी डॉ. सुधाकर शेट्टी, गोविंद सिंग, मोनिका धवन, सायना भरुचा, हीना कुरेशी, अमित यादव, धीरज गुप्ता, वैभवी मनुकर, हर्षदा मोडक आणि रिया खंदुरी उपस्थित होते.
हा उपक्रम इंडिया व्हिजन फाउंडेशनच्या सहकार्याने राबवण्यात आला आहे. या फाउंडेशनने याआधी मुंबईतील भायखळा महिला कारागृहात असा उपक्रम सुरू केला होता. त्यानंतर आता पुण्यातील येरवडा महिला कारागृहात ‘रेडिओ तरंग’चा शुभारंभ झाला आहे.
येरवडा कारागृहाचे अधीक्षक सुनील ढमाळ आणि महिला कारागृहाच्या अधीक्षक पल्लवी कदम यांनी सांगितले की, “या रेडिओ उपक्रमामुळे महिला कैद्यांच्या जीवनात आनंद आणि आत्मविश्वासाचा नवा किरण येईल. त्यांना शिक्षण, माहिती आणि मानसिक समाधानाचं साधन मिळेल.”
कारागृह आणि सुधारसेवा विभागाचे महानिरीक्षक व अतिरिक्त पोलीस महासंचालक डॉ. सुहास वारके, तसेच विशेष कारागृह महानिरीक्षक योगेश देसाई यांच्या मार्गदर्शनाखाली हा उपक्रम पूर्ण करण्यात आला.
सध्या येरवडा महिला कारागृहात सुमारे ३०० महिला कैदी असून त्यांपैकी १०० जणी शिक्षा भोगत आहेत, तर उर्वरित न्यायप्रविष्ट बंदी आहेत. ‘रेडिओ तरंग’च्या सुरूवातीने या महिला कैद्यांमध्ये उत्साहाचे वातावरण निर्माण झाले आहे.
कैद्यांच्या मागणीनुसार या कक्षातून भक्तिगीते, मनोरंजनपर गाणी, तसेच सरकारी योजनांची आणि कायदेविषयक माहिती प्रसारित केली जात आहे. कारागृहातील अधिकारी म्हणाले की, “या उपक्रमामुळे महिला कैद्यांच्या चेहऱ्यावर आनंद आणि आत्मविश्वास परत आला आहे. त्यांच्या दैनंदिन जीवनात हा रेडिओ कक्ष नव्या ऊर्जेचा स्रोत ठरत आहे.”
