शहरातील आरोग्य क्षेत्रात माजली खळबळ
पुणे: पुणे महापालिकेने (PMC) शहरातील आठ खासगी रुग्णालयांना विविध अनियमिततेच्या मुद्द्यावरून कारणे दाखवा नोटीस बजावली आहे. या रुग्णालयांनी रुग्णांकडून जास्तीचे शुल्क आकारणे, आवश्यक दस्तऐवजांचा अभाव, तसेच परवानगी अटींचे उल्लंघन केल्याचे प्राथमिक तपासात समोर आले आहे.
महापालिकेच्या (PMC) आरोग्य विभागाने केलेल्या तपासणीदरम्यान, काही रुग्णालयांनी उपचार व सुविधांसाठी निर्धारित शुल्क संरचनेपेक्षा अधिक पैसे घेतल्याचे आढळले. तसेच, वैद्यकीय कचरा व्यवस्थापन, रुग्णांच्या नोंदींचे योग्य संधारण, आणि आवश्यक परवाने याबाबत गंभीर त्रुटी असल्याचेही निष्पन्न झाले.
नोटीस मिळालेल्या रुग्णालयांना महापालिकेने ७ दिवसांचा अवधी देत या आरोपांवर स्पष्टीकरण देण्याचे आदेश दिले आहेत. दिलेल्या वेळेत समाधानकारक उत्तर न दिल्यास किंवा दोष सिद्ध झाल्यास, संबंधित रुग्णालयांवर दंड, परवाना निलंबन किंवा इतर कायदेशीर कारवाई करण्यात येणार असल्याचे महापालिकेने (PMC) स्पष्ट केले आहे.
महापालिकेच्या अधिकाऱ्यांनी सांगितले की, “रुग्णांच्या हक्कांचे रक्षण करणे आणि आरोग्य सेवांची गुणवत्ता कायम ठेवणे हे आमचे कर्तव्य आहे. त्यामुळे रुग्णालयांनी नियमांचे काटेकोर पालन करणे गरजेचे आहे.”
या कारवाईमुळे शहरातील आरोग्य क्षेत्रात खळबळ माजली असून, रुग्ण व त्यांच्या नातेवाईकांनी पालिकेच्या कारवाईचे स्वागत केले आहे. नागरिकांनी मात्र अशी तपासणी नियमितपणे व्हावी, जेणेकरून रुग्णांची फसवणूक होणार नाही, अशी मागणी केली आहे.
