शिरुर : गेल्या अनेक दिवसांपासून पिंपरखेड परिसरात दहशत निर्माण करणाऱ्या नरभक्षक बिबट्याचा अखेर शेवट झाला. मंगळवारी रात्री वनविभागाच्या शार्प शूटर पथकाने नेम साधून त्या बिबट्याला ठार केले. या कारवाईनंतर भीतीच्या छायेत जगणाऱ्या ग्रामस्थांनी अखेर सुटकेचा नि:श्वास सोडला.
गेल्या पंधरा दिवसांत बिबट्याने तीन निरपराधांचा बळी घेतला होता. यामध्ये रोहन बोंबे (१३ वर्षे), शिवन्या बोंबे (५ वर्षे), भागूबाई रंगनाथ जाधव (८५ वर्षे) यांचा समावेश आहे. या सलग हल्ल्यांमुळे परिसरात भीती आणि संताप दोन्ही वाढले होते. ग्रामस्थांनी रास्ता रोको आणि गावबंद आंदोलन करून वनविभागाच्या निष्क्रियतेचा निषेध नोंदवला होता.
ग्रामस्थांच्या ताणतणावाच्या पार्श्वभूमीवर, वनसंरक्षक आशिष ठाकरे यांनी प्रधान मुख्य वनसंरक्षक (वन्यजीव) यांची परवानगी घेऊन बिबट्याला पकडण्याची किंवा ठार करण्याची परवानगी मिळवली. त्यानंतर रेस्क्यू फोर्सचे डॉ. प्रसाद दाभोलकर, जबीन पेस्टवाला, डॉ. सात्विक पाठक आणि दोन शार्प शूटर घटनास्थळी दाखल झाले.
थर्मल ड्रोन आणि सीसीटीव्ही कॅमेऱ्यांच्या मदतीने बिबट्याचा मागोवा घेण्यात आला. रात्री साडेदहाच्या सुमारास बिबट्या दिसल्यानंतर त्याला बेशुद्ध करण्यासाठी डार्ट मारण्यात आला, परंतु तो अपयशी ठरला. त्यानंतर चिडलेल्या बिबट्याने प्रतिहल्ला केला आणि त्या क्षणी शार्प शूटरने अचूक नेम साधत त्याला ठार केले. संपूर्ण थरार सुमारे ३० मिनिटे चालला. मृत बिबट्या अंदाजे ५ ते ६ वर्षांचा नर असून, त्याचे शव ग्रामस्थांना दाखवण्यात आले. त्यानंतर माणिकडोह बिबट्या निवारण केंद्रात शवविच्छेदनासाठी हलविण्यात आले.
या मोहिमेत जुन्नरचे उपवनसंरक्षक प्रशांत खाडे, सहायक वनसंरक्षक स्मिता राजहंस, अमृत शिंदे, तसेच तालुका वनाधिकारी नीलकंठ गव्हाणे यांनी महत्त्वाची भूमिका बजावली. जिल्हाधिकारी जितेंद्र डुडी यांनी यापूर्वी घटनास्थळी भेट देऊन ग्रामस्थांना आश्वासन दिले होते. बिबट्यांच्या हल्ल्यांमुळे तणावग्रस्त झालेल्या परिसरात आता शांतीचे वातावरण परतले आहे. बिबट्याच्या मृत्यूनंतर ग्रामस्थांनी वनविभागाचे आभार मानले, मात्र भविष्यात असे प्रसंग टाळण्यासाठी कायमस्वरूपी उपाययोजना हवी, अशी मागणीही त्यांनी केली आहे.
#Shirur #PuneNews #बिबट्या #Pimparkhed #ManEaterLeopard #BreakingNews #WildlifeRescue #वनविभाग #LeopardCaptured #PuneUpdates #MaharashtraNews #वन्यजीवसंरक्षण #ViralNews #PuneWildlife #WildlifeIndia #ShirurTaluka #TrendingNow #PuneViralNews #बिबट्याठार #ForestDepartment
