नीलेश घायवळचा पूर्वश्रमीचा साथीदार संतोष धुमाळसह तिघांवर ‘मोक्का’
तुझ्यामुळे मला अटक झाली, १० लाखांची मागितली होती खंडणी
पुणे : तुझ्यामुळे मला अटक झाली, १० लाख रुपये दे, नाही तर गोळ्या खायला तयार रहा, अशी धमकी देऊन तरुणाकडे खंडणी मागणार्‍या गॅगस्टर नीलेश घायवळचा एकेकाळाचा साथीदार संतोष धुमाळ याच्यासह तिघांवर पोलिसांनी मोक्का कारवाई केली आहे़
संतोष आनंद धुमाळ, सागर गवासने आणि विपुल उत्तम माझिरे अशी मोक्का कारवाई झालेल्यांची नावे आहेत. गेल्या महिन्यात त्यांच्यावर खंडणीचा गुन्हा दाखल करण्यात आला होता, त्यानंतर ते अजूनही फरार आहेत़
संतोष धुमाळ याच्यावर यापूर्वी खुन, खुनाचा प्रयत्न, खंडणी, आर्म अ‍ॅक्ट असे एकूण २१ गुन्हे दाखल आहेत. यापूर्वी त्याला तडीपार, मोक्का कारवाई करण्यात आली होती. सागर गवासने याच्यावर जामखेड, बीड, उस्मानाबाद येथे एकूण १० गुन्हे आहेत. विपुल माझिरे याच्यावर २ गुन्हे दाखल आहेत.
संतोष धुमाळ हा पूर्वी नीलेश घायवळ टोळीचा खास सदस्य होता. परंतु, काही कारणावरुन त्यांच्यात वाद झाले. त्यानंतर त्याने घायवळ टोळी सोडली.
याबाबत रोहित आखाडे यांनी कोथरुड पोलीस ठाण्यात फिर्याद दिली आहे. रोहित आखाडे हा पूर्वी संतोष धुमाळ याच्या टोळीमध्ये होता. एका गुन्ह्यात आखाडे याला अटक करण्यात आली होती. त्यानंतर पोलिसांनी संतोष धुमाळ याला २०२१ मध्ये अटक केली होती. ४ सप्टेंबर २०२५ रोजी संतोष धुमाळ व इतर दोघांनी रोहित आखाडे याला सांगितले की, तुझ्यामुळे मला अटक झाली. १० लाख रुपये दे, नाहीतर गोळ्या घालीन, अशी धमकी दिली होती. सहायक पोलीस आयुक्त भाऊसाहेब पठारे हे अधिक तपास करीत आहेत़
