अवैध शस्त्र तस्करी प्रकरणात सहभागाचा आरोप; कुटुंबीयांचा ‘खोट्या गुन्ह्यात अडकवले’ असा दावा
पुणे / लुधियाना | 31 ऑक्टोबर 2025
आंतरराष्ट्रीय कुस्तीपटू आणि ‘महाराष्ट्र केसरी’ किताब विजेता सिकंदर शेख याला पंजाब पोलिसांनी अवैध शस्त्र तस्करी प्रकरणात अटक केली आहे. प्राथमिक तपासानुसार, सिकंदरचा या शस्त्र पुरवठा रॅकेटमध्ये सहभाग असल्याचा संशय व्यक्त करण्यात आला आहे.
पंजाब पोलिसांनी दिलेल्या माहितीनुसार, राजस्थानातील पपला गुर्जर टोळीशी सिकंदरचे संपर्क असल्याचे पुरावे समोर आल्यानंतर ही कारवाई करण्यात आली. या घटनेमुळे महाराष्ट्राच्या कुस्ती क्षेत्रात मोठी खळबळ उडाली आहे.
पंजाब पोलिसांकडून या प्रकरणातील तपास वेगाने सुरू असून, लवकरच अधिकृत माहिती प्रसिद्ध होण्याची शक्यता आहे. दरम्यान, सिकंदर शेखच्या अटकेमुळे महाराष्ट्रातील कुस्ती वर्तुळात आश्चर्य, संताप आणि संभ्रमाचे वातावरण निर्माण झाले आहे.
त्याचे कुटुंबीय सध्या माध्यमांसमोर बोलण्यास तयार नसले तरी त्यांनी असा आरोप केला आहे की, “आमच्या मुलाला खोट्या गुन्ह्यात अडकवले जात आहे. त्याचा या प्रकरणाशी काहीही संबंध नाही.”
सिकंदर शेख 2023 मध्ये पुण्यात झालेल्या ‘महाराष्ट्र केसरी’ स्पर्धेच्या माती गटातील अंतिम फेरीत पंचांच्या वादग्रस्त निर्णयामुळे चर्चेत आला होता. त्या निर्णयावर सोशल मीडियावर मोठ्या प्रमाणात टीका झाली होती, आणि त्याला ‘जनतेच्या मनातील महाराष्ट्र केसरी’ अशी ओळख मिळाली होती.
यानंतर पुढच्याच वर्षी, ‘महाराष्ट्र केसरी 2024’ स्पर्धेत सिकंदरने मानाची गदा जिंकून प्रत्यक्ष विजेतेपद मिळवले. त्याआधी पंढरपूरजवळ झालेल्या ‘भीमा केसरी कुस्ती स्पर्धेत’ त्याने स्वतःला “जनतेच्या मनातील महाराष्ट्र केसरी” म्हणून संबोधले होते.
#महाराष्ट्रकेसरी #SikandarShaikh #SikandarShaikhArrest #PunjabPolice #KushtiNews #MarathiNews #BreakingNewsMarathi #MaharashtraKesari2024 #MaharashtraSports #WrestlingIndia #PuneNews #MarathiBreakingNews #SportsControversy #MaharashtraKesari #MarathiInstagramNews #कुस्ती #SportsAlert #thelakhantalk #thelakhantalkenglish #दलखनटॉक
