हिंजवडी इंडस्ट्रीज असोसिएशन (HIA), महाराष्ट्र औद्योगिक विकास महामंडळ (MIDC) आणि पिंपरी-चिंचवड प्रादेशिक परिवहन कार्यालय (RTO)
पुणे : राजीव गांधी इन्फोटेक पार्क (हिंजवडी) येथे पूर्वी लोकप्रिय ठरलेली मेट्रोझिप शटल बस सेवा पुढील महिन्यात पुन्हा सुरु होणार आहे. पुण्याच्या वेगाने वाढणाऱ्या IT क्षेत्रातील दैनंदिन वाहतूककोंडी कमी करण्यासाठी हा महत्त्वपूर्ण निर्णय घेण्यात आला आहे.
ही सेवा पुन्हा सुरू करण्यासाठी हिंजवडी इंडस्ट्रीज असोसिएशन (HIA), महाराष्ट्र औद्योगिक विकास महामंडळ (MIDC) आणि पिंपरी-चिंचवड प्रादेशिक परिवहन कार्यालय (RTO) यांनी एकत्र येत काम सुरू केले आहे. सर्व आवश्यक परवानग्यांसाठी प्रस्ताव सादर करण्यात आले असून, ऑगस्ट अखेरीस मंजुरी मिळण्याची अपेक्षा आहे.
सप्टेंबर २०१४ मध्ये, मेट्रोझिप ही खासगी बस सेवा म्हणून सुरू करण्यात आली होती. ही सेवा निवासी भागांमधून हिंजवडीतील प्रमुख IT कंपन्यांपर्यंत कर्मचारी नेण्यासाठी सुरु करण्यात आली होती. एकूण ११३ बसगाड्यांद्वारे दररोज ६,००० पेक्षा अधिक कर्मचारी प्रवास करत होते, ज्यामुळे कार्यालय वेळेतील वाहतूक मोठ्या प्रमाणात कमी झाली होती.
मात्र, मार्च २०२० मध्ये कोविड-१९ महामारी आल्यामुळे अनेक IT कंपन्यांनी वर्क फ्रॉम होमची अंमलबजावणी केली, आणि मेट्रोझिप सेवा बंद करण्यात आली. आता पुन्हा कंपन्यांनी कार्यालयात उपस्थिती अनिवार्य केल्यामुळे, प्रवाशांची संख्या वाढली असून खासगी वाहनांमुळे वाहतूककोंडी वाढत आहे.
“मेट्रोझिपमुळे खासगी वाहनांची संख्या कमी होऊन वाहतूक सुरळीत झाली होती. आता आम्ही ही सेवा Cocorides या कंपनीच्या सहकार्याने पुन्हा सुरू करत आहोत,” अशी माहिती HIAचे वाहतूक सेवा प्रमुखशंकर सालोकार यांनी दिली.
“वाहतूक नियंत्रणासाठी खासगी वाहनांचा वापर कमी करणे अत्यावश्यक आहे. नियमांनुसार बस सेवा परवानगीने सुरू झाली, तर अर्धवट का होईना पण समस्या सुटेल,” असे पिंपरी-चिंचवडचे प्रादेशिक परिवहन अधिकारी संदेश चव्हाण यांनी सांगितले.
“PMPL कडून औद्योगिक कामगारांसाठी आधीच सेवा चालवली जाते. त्याशिवाय आणखी खासगी बस सेवा सुरू होणे ही स्वागतार्ह बाब आहे. त्यामुळे वाहतूक सुरळीत करण्यास आणखी मदत होईल,” असे MIDCचे मुख्य अभियंता नितीन वानखेडे यांनी नमूद केले.
मेट्रोझिप सेवा आता Cocorides (Routematic) या मोबिलिटी मॅनेजमेंट कंपनीच्या माध्यमातून पुन्हा चालवण्यात येणार आहे. मार्गांबाबतचा प्रस्ताव सध्या विचाराधीन आहे. सर्व परवानग्या वेळेत मिळाल्यास ही सेवा सप्टेंबर २०२५ पासून सुरू होण्याची शक्यता आहे.
या सेवेचा उद्देश म्हणजे उपनगर आणि कार्यालयीन संकुलांमधील दळणवळण सुलभ करणे, ज्यामुळे प्रवासी खासगी वाहनांवर अवलंबून न राहता शाश्वत आणि सामायिक प्रवासाकडे वळतील, अशी अपेक्षा व्यक्त केली जात आहे.
महत्त्वाचे मुद्दे:
IT वाहतुकीवरील भार कमी करणे : दररोज हजारो कर्मचारी हिंजवडीमध्ये ये-जा करतात. विश्वासार्ह बस सेवा सुरू झाल्यास शेकडो खासगी वाहने रस्त्यावरून हटवता येतील.
शाश्वत प्रवासाचा पर्याय : वातानुकूलित, वेळापत्रकानुसार धावणारी मेट्रोझिप सेवा ही सोलो ड्रायव्हिंगला एक पर्यावरणपूरक पर्याय ठरेल.
सार्वजनिक‑खाजगी भागीदारीचे उदाहरण : ही सेवा हे उद्योग, शासकीय यंत्रणा आणि खाजगी सेवा पुरवठादार यांच्यातील यशस्वी समन्वयाचे उदाहरण ठरत आहे.
