बनावट पासपोर्ट प्रकरणी निलेश घायवळविरुद्ध गुन्हा दाखल
कोथरुड पोलिसांनी २० दिवसात दाखल केले चार गुन्हे, पासपोर्ट कसा मिळविला याचा घेणार शोध
पुणे : बनावट कागदपत्रांद्वारे पासपोर्ट मिळविल्याप्रकरणी कोथरुड पोलिसांनी गँगस्टर निलेश घायवळ याच्याविरुद्ध गुन्हा दाखल केला आहे. कोथरुड गोळीबार प्रकरणासह निलेश घायवळ याच्यावर गेल्या २० दिवसात आतापर्यंत ४ गुन्हे दाखल झाले आहेत.
याबाबत पोलीस उपनिरीक्षक मोहन जाधव यांनी कोथरुड पोलीस ठाण्यात फिर्याद दिली आहे. निलेश बन्सीलाल घायवळ (वय ४९, रा. संत ज्ञानेश्वर कॉलनी, शास्त्रीनगर, कोथरुड) तसेच त्याला पासपोर्ट काढून देण्यासाठी मदत करणाºया प्रत्यक्ष व अप्रत्यक्षांवर गुन्हा दाखल केला आहे.
कोथरुडमधील मुठेश्वर मित्र मंडळ येथे दुचाकीला साईड न दिल्याच्या कारणावरुन निलेश घायवळ टोळीतील गुंडांनी तरुणावर गोळीबार केला होता. त्यात निलेश घायवळ सह १० जणांवर गुन्हा दाखल करण्यात आला. त्यांच्यावर महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई करण्यात आली आहे. दरम्यान, निलेश घायवळ हा बनावट पासपोर्टवर ९० दिवसांच्या व्हिसावर स्वित्झलँडला गेल्याचे समोर आले आहे. त्याने अहिल्यानगर येथील पत्त्यावर तत्काळ मधून पासपोर्ट मिळविला आहे. निलेश याने गायवळ या नावाने खोट्या नावाचा वापर करुन खोट्या मार्गाने पासपोर्ट मिळविल्याचे समोर आले आहे. कोथरुड पोलिसांनी अहिल्यानगर येथे जाऊन चौकशी केली. त्यात अहिल्यानगर पोलिसांनी पासपोर्टसाठी दिलेल्या पत्त्यावर तो मिळून येत नाही, असा शेरा मारुन तो अहवाल पासपोर्ट कार्यालयाला पाठविला होता. तरीही पासपोर्ट विभागाने त्याला पासपोर्ट कसा दिला़ त्यासाठी त्याने कोणत्या एजंटाचा वापर केला़ त्याला पासपोर्ट विभागातील अधिकाºयांनी सहकार्य केले का याचा शोध घेतला जात आहे़ यासाठी कोथरुड पोलिसांनी बनावट कागदपत्रे तयार करणे, त्यासाठी इलेक्ट्रॉनिक साधनाचा वापर करणे अशा विविध कलमासह पासपोर्ट अ‍ॅक्टखाली गुन्हा दाखल केला आहे.
घायवळ याचे कोथरूडमधील शास्त्रीनगर भागातील संत ज्ञानेश्वर कॉलनीत घर आहे. त्याचे घर आणि कार्यालयाची झडती कोथरूड पोलिसांनी शनिवारी घेतली होती. घरातून पोलिसांनी दोन काडतुसे, चार पुंगळ्या जप्त केल्या. पोलिसांनी घायवळ याच्या घरातून धाराशिव, पुणे, मुळशी, जामखेड येथील जमिनीसंदर्भातील खरेदीखत, साठेखतासह अन्य कागदपत्रे, तसेच १० तोळे सोन्याचे दागिने पोलिसांनी जप्त केले आहेत.
