मिळकत कर कमी करून देण्याच्या तसेच थकबाकीमध्ये सवलत मिळवून देण्याचे आमिष दाखवून फसवणूक
पुणे : मिळकत कर कमी करून देण्याच्या तसेच थकबाकीमध्ये सवलत मिळवून देण्याचे आमिष दाखवून मिळकत फसवणूक केली जात असल्याचे प्रकार समोर येऊ लागले आहेत. त्यामुळे नागरिकांनी अशा मध्यस्थ-दलाल-परिचित-अपरिचित व्यक्तींपासून सावध राहण्याचे आवाहन महापालिकेच्यावतीने करण्यात आले आहे.
महानगरपालिका हद्दीतील मिळकतधारकांना काही मध्यस्थ/दलाल/परिचित/अपरिचित/व्यक्तीं मिळकतकर कमी करून देतो तसेच थकबाकी कमी करून देतो असे सांगून नागरिकांकडून रोख स्वरुपात पैसे घेत असल्याचे निदर्शनास आले आहे. यामधून नागरिकांची मोठ्या प्रमाणावर आर्थिक फसवणूक होण्याची शक्यता आहे. अशी कोणतीही व्यक्ती कर कमी करून देण्यासंदर्भात खोटे दावे करीत असल्यास अगर पैशांची मागणी करीत असल्यास अशा व्यक्तीसोबत कोणताही आर्थिक व्यवहार अथवा इतर तत्सम स्वरुपाची देवाण-घेवाण करू नये, असे पालिकेने प्रसिद्धीस दिलेल्या निवेदनात म्हटले आहे.
अशा व्यक्तींकडून नागरिकांची दिशाभूल व फसवणूक होण्याची शक्यता आहे. त्यामुळे त्याला बळी पडू नये. कोणाची फसवणूक झाल्यास त्याला महापालिका प्रशासन जबाबदार राहणार नाही, याची सर्व नागरिकांनी नोंद घ्यावी, असेही नमूद करण्यात आले आहे. नागरिकांनी आपला मिळकत कर पालिकेच्या अधिकृत वेबसाईटवरून (propertytax.punecorporation.org) पालिकेची नागरी सुविधा केंद्र (CFC), बँक ऑफ महाराष्ट्र, आयसीआयसीआय बँक, कॉसमॉस बँक, जनता सहकारी बँक, पुणे येथेच रोख, धनादेश, डीडीने भरावा व त्याची अधिकृत पावती घ्यावी, असेही निवदनात नमूद करण्यात आले आहे.
