– वनराज आंदेकरच्या खुनासाठी पिस्तुल पुरविणार्‍याच्या भावाचा कोंढव्यात ‘गेम’
पुणे : आंदेकर-कोमकर टोळी युद्धामधून पुन्हा एकदा एकाचा बळी गेला. वनराज आंदेकर यांच्या खुनासाठी मध्यप्रदेशातून पिस्तुले आणणाऱ्या गुंडाच्या भावाचा गोळीबार करून तसेच कोयत्याने वार करून निर्घृण खून करण्यात आला. ही घटना कोंढवा येथील खडी मशीन चौकात असलेल्या भारत पेट्रोलियमजवळ शनिवारी दुपारी साडेतीनच्या सुमारास घडली.
प्राथमिक माहितीनुसार, गणेश काळे (वय 32, रा. येवलेवाडी) असे खून झालेल्याचे नाव आहे. त्याचा जागीच मृत्यू झाला आहे. गणेश काळे याच्यावर ६ गोळ्या झाडण्यात आल्या़ पाऊस सुरु असताना भर दुपारी ही घटना घडली. गणेश हा वनराज आंदेकर खून प्रकरणातील आरोपी समीर काळे याचा भाऊ असल्याची प्राथिमक माहिती मिळाली आहे. पोलिसांनी सीसीटीव्ही फुटेजच्या आधारे तपासाला सुरुवात केली आहे. पुण्यात गणेश काळे याच्यावर गंभीर गुन्ह्यांची नोंद आहे.
खून झालेला गणेश काळे हा समीर काळे याचा भाऊ आहे. समीर हा सोमा ऊर्फ सोमनाथ गायकवाड टोळीतील सदस्य आहे. गणेश काळेवर सहा राऊंड फायर करण्यात आल्याची प्राथमिक माहिती असून त्याच्यावर कोयत्याने देखील वार करण्यात आले आहेत. याच समीर काळे याने वनराज आंदेकरच्या खुनात वापरलेली पिस्तुले मध्यप्रदेशातून आणली होती. ही 9 पिस्तूले मध्यप्रदेशातून आणण्याची जबाबदारी सोमा गायकवाड टोळीतील सदस्य समीर काळे, आबा खोंड, आकाश म्हस्के, संगम वाघमारे यांच्यावर देण्यात आली होती. हे चौघे एका चारचाकी मोटारीतून धुळे मार्गे मध्यप्रदेशात गेले. तेथून त्यांनी 9 पिस्तूले आणली. समीर हा सध्या कारागृहात आहे. त्याचा भाऊ गणेश याचा पळत ठेवून खून करण्यात आला आहे.
वनराज आंदेकर याच्या खुनातील मुख्य आरोपी गणेश कोमकर याचा मुलगा आयुष कोमकर याचा गणेश विसर्जन मिरवणुकीच्या पूर्वसंध्येला गोळ्या झाडून खुन करण्यात आला होता. त्यामध्ये आंदेकर टोळीतील मुख्य सुत्रधार बंडु आंदेकर याच्यासह जवळपास १५ जणांना पोलिसांनी अटक केली आहे. त्याचे गुन्हेगारी साम्राज्य उद्धवस्त करण्याचा प्रयत्न पोलिसांनी सुरु केला आहे. असे असताना वनराज आंदेकर याच्या खुनामधील आरोपीच्या भावाचा गोळ्या झाडून खुन करण्यात आला आहे.
या घटनेची माहिती मिळताच पोलीस उपायुक्त डॉ़ राजकुमार शिंदे यांच्यासह सर्व पोलीस अधिकाऱ्यांनी घटनास्थळी धाव घेतली.
