तरुणावर कुकरीचा महाप्रहार; एका तरुणाचा अंत, तीन अल्पवयीन ताब्यात
पुणे : शहराच्या वर्दळीच्या बाजीराव रस्त्यावर मंगळवारी दुपारी पुणेकरांनी रक्तरंजीत थरार अनुभवला. साधारण सव्वा तीनच्या सुमारास तीन अल्पवयीन मुलांनी पूर्ववैमानस्यातून एका 17 वर्षीय तरूणावर धारदार हत्याराने हल्ला चढवला. या हल्ल्यात मयांक सोमदत्त खरारे याचा मृत्यू झाला आहे. या हल्ल्यात सहभागी असलेल्या तीन अल्पवयीन आरोपींना पोलिसांनी तात्काळ कात्रज परिसरातून ताब्यात घेतले. ही थरारक घटना बाजीराव रस्त्यावर असलेल्या महाराणा प्रताप उद्यानाजवळ घडली.
पोलिसांनी दिलेल्या माहितीप्रमाणे, मयांक आणि त्याचा मित्र दुचाकीवरून जात होते. त्यावेळी त्यांच्या पाठीमागून आलेल्या तिघांनी त्यांना दुचाकी आडवी घालून रस्ता अडवला. काही कळायच्या आतच मयांकच्या डोक्यात आणि चेहऱ्यावर कुकरीने वार करण्यात आले. मयांक रक्ताच्या थारोळ्यात पडला होता. त्याला तातडीने ससून रुग्णालयात हलवण्यात आले. मात्र, डॉक्टरांनी त्याला मृत घोषित केले. मयांकचा साथीदार (वय १७, रा. दांडेकर पूल) हा जखमी झाला असून त्याच्यावर उपचार सुरू आहेत.
घटनेनंतर परिसरात दहशतीचे वातावरण निर्माण झाले होते. नागरिकांमध्ये घबराट पसरली होती. माहिती मिळताच पोलिसांनी घटनास्थळी धाव घेतली. पोलिसांनी सीसीटीव्ही फुटेज ताब्यात घेत तपासण्यास सुरुवात केली. घटनास्थळाचा पंचनामा करण्यात आला असून साक्षीदारांकडे चौकशी सुरू करण्यात आली आहे. घटनास्थळावरून कुकरी आणि इतर पुरावे पोलीस तपास पथकाने ताब्यात घेतले आहेत.
पोलिसांनी तात्काळ शोध कार्य राबवून तीनही आरोपींना ताब्यात घेतले आहे. हे तिघेही पर्वती परिसरामधील रहिवासी आहेत. सध्या या प्रकरणात कोणत्याही गुन्हेगारी टोळीचा संबंध आढळून आलेला नाही. प्राथमिक तपासातून हा प्रकार पूर्ववैमनस्यातून घडल्याचे समोर आले आहे. मयांक आणि आरोपी मुलांमध्ये तीन महिन्यांपूर्वी वाद झालेला होता. त्यातूनच मयांकचा खून करण्यात आला.
परिमंडळ एकचे पोलीस उपायुक्त कृषिकेश रावले यांनी सांगितले “ही एक गंभीर घटना आहे. आम्ही घटनास्थळी लगेच पोहोचून सर्व पुरावे ताब्यात घेतले असून, प्रकरणाचे सर्व पैलू उघड करण्यासाठी कसून चौकशी करत आहोत.”
